Gecən xeyirə qalsın, yetim kölgəm heeey...

Gecən xeyirə qalsın, Anamın günəş üzü! 

Qəlbimə geydiyim səhərlər ki, var

Mənə bu gecətək yaraşan deyil... 

Gecən xeyirə qalsın, yarımçıq yuxum

Sağ ol ki gözümə qar gətirmişdin... 

Gecən xeyirə qalsın, ay körpə qışım

Sağ ol, gülüşümü itirməmişdin... 

Gecən xeyirə qalsın, buludlu baca

Gecən xeyirə qalsın, adamsız evim... 

Hələ də inanır səhər olacaq, 

Nağılla dolacaq nağılsız evim... 

Gecən xeyirə qalsın yolum, yoldaşım

Gecən xeyirə qalsın, ağac budağı... 

Sübhün mürgüsündə çiçəyin solsa, 

Öpüb gözün üstə qoy o yarpağı! 

Onun da gecəsi ümid istəyir

Bilməzsən yaşılın kim solduracaq... 

Öpüb gözün üstə qoymasan indi

Bu gecə öləcək, yaşamayacaq... 

Gecən xeyirə qalsın yaşıl yarpağım

Adamlar rəngini itirib yerdə... 

Gələcəm dilimdə şeir üşüyəndə

Gələcəm, demə ki, düşmüsən dərdə

Gecən xeyirə qalsın qərib göy üzü! 

Sən məni bağışla yaşlı yaşıma... 

Səhər açıldımı, itəcək izim

Qəlbimi götürüm, gedim uzağa...