İmarət Cəlilqızı. Şeirlər
Poeziya
- 03.01.2019
- 0 Şərh
- 2214 Baxış
BAĞLI QAPI
Bağlı qapı...
arxasında
sirli şeylər çox,
kilidinə düşən açar
bir kimsədə yox.
Açmaq yana,
bircə nəfər də döymədi,
dəstəyinə
ömrü boyu əl dəymədi.
Heç kim açmaq istəmədi
bu kilidi,
Bağlı qapı
öz-özünə hey göynədi,
öz-özünə gah ağladı,
gah kiridi...
Bağlı qapı
bağlı-bağlı çürüdü...
NƏ YER, NƏ DƏ GÖY
Ruhum uçsa
səmalara,
enmək istəməz,
tərk etdiyi
vücuduna
dönmək istəməz.
Yerə bağlı
vücudumun
yel atları yox,
Göyə uçmaq
istəsə də,
qanadları yox.
Bir Göy vardır,
bir Yer vardır,
bəs bir də hara?
varsa, Tanrım,
götür məni
tez apar ora!
İNSAN
Sən, bəlkə də, güclüsən,
Sən, bəlkə də, gözəlsən,
ağıllısan, ustasan,
çox şeylərə qadirsən,
amma nolsun,
yenə də
özün özünə sirsən.
Sən kimsən ki?
Allahın bir günahkar bəndəsi,
sən heç bir şey olardın,
olmasaydı üstündə
Yaradanın kölgəsi.
Bu kölgədən qıraqda
sən atəşlər içində
qıvrılarsan, yanarsan,
çəkdiyin iztirablar
gözündə yaşa dönər,
bir ümid axtararsan,
bir təsəlli gəzərsən,
ümidin, təsəllinin
ürəyi daşa dönər.
Anlaşılmaz bir qorxu
heybətli kabus kimi
sarılar vücuduna,
zəhərli caynağını
batırar ürəyinə,
ürəyin qopub düşər
ayağının altına,
ürəksiz vücudunu
arxasınca sürüyər,
cəhənnəmin ən dərin,
ən dəhşətli qatına.
Bu kölgədən qıraqda
nə zəkisən, nə dəli,
nə ölüsən, nə diri,
ölərsən, dirilərsən
gündə neçə yüz kərə,
bir kimsə də bacarmaz,
bir kimsə də tapılmaz
könlünə dinclik verə…
...Qaytar, İlahi, qaytar
kölgəni dananları,
kölgəndən sapanları
kölgən düşdüyü yerə.
***
Sağ tərəf buz-
donuram
sol tərəf od-
yanıram,
orta yolda
tıxac var...
Mənə cüt qanad verin!--
mənzilə yubanıram.
***
bir yuxu gördün,
dur, kağıza yaz,
bəndə arama,
səbr elə bir az.
qalx, aya söylə,
düş, çaya söylə,
ay susar, amma
çay susar, amma
yanlışa yozmaz...