İlkin Tomar&Məlik Cahan - Onlar kimi - Şeir
Poeziya
- 09.02.2015
- 0 Şərh
- 1117 Baxış
İlkin Tomar:
Soyuq baxışıma tuş gələcəksən,
Min dəfə öləcək, diriləcəksən,
Sağa – sola baxıb hey süzəcəksən,
Qatardan üzülən durnalar kimi.
Məlik Cahan:
Mən yoxam, deməli, yox sənə dayaq,
Mən şirin yuxuda, sən isə oyaq,
Düşüb səhralara səfillər sayaq,
Məni axtararsan axmaqlar kimi.
İlkin Tomar:
Düşünmə çarəni sən tapacaqsan
Günlərlə ağrıdan sızlayacaqsan
Hər gün qabıq verib qanayacaqsan
Heç vaxt sağalmayan yaralar kimi
Məlik Cahan:
Gec olar peşmanlıq çəkdiyin zaman,
Sən bədbəxt qızcığaz, həyatın viran,
Gözünün çeşməsi dayanmaz bir an,
Yazda coşub - daşan bulaqlar kimi.
İlkin Tomar:
Sənsiz həzz alıram mən yaşamaqdan
Bil ki sən olacaqsan yerində sayan,
Yalnız sənin üçün duracaq zaman,
Daşı çoxdan ölmüş saatlar kimi.
Məlik Cahan:
Özün də səhvini anlayacaqsan,
Güzgüdə özünü danlayacaqsan,
Düşüb ayağıma ağlayacaqsan,
Üç yaşli, beş yaşli uşaqlar kimi.
İlkin Tomar:
Guya ki, mən səni axtarırmışam?!
Kim dedi yolunda ağac olmuşam?
Sənə uşaqlıqda mən inanmışam,
Göydən alma düşən nağıllar kimi.
Məlik Chan:
Hər gecə qəlbinə qəhər girəcək,
Mənsiz həyatına zəhər girəcək,
Soyuq yatağına kədər girəcək,
Abırsız, həyasız qonaqlar kimi.
İlkin Tomar:
Uzaqdan xəbərim gələcək sənə,
Göz yaşın dönəcək yanaqda selə,
Qürurun püskürüb çıxacaq çölə,
Yuxudan oyanmış vulkanlar kimi.
Məlik Cahan:
Hər məni görəndə tutulacaqsan,
Məcbur bu əzaba qatılacaqsan,
Sevilib, sevilib atılacaqsan ,
Köhnələn lazımsiz əşyalar kimi...
Ədəbiyyat.biz