Rey Bredberi. Xəyalətlərin vaxtı (hekayə)
Tərcümə
- 02.06.2014
- 0 Şərh
- 1507 Baxış
Rey Bredberi
Xəyalətlərin vaxtı
(hekayə)
Ən yaxşı vaxt idi. Günün qəribə vaxtı. Bu, Xəyalətlərin vaxtı idi.
Timatinin otağının ortasında nə isə fırlandı və qeyri-adi kölgə peyda oldu.Ralfın otağının ortasında isə ağlagəlməz böyüklükdə və sirli görünüşə malik ikinci kölgə ayağa qalxdı.Dəhlizin o biri tərəfində , Elisin yatağının düz ortasında o tərəf- bu tərəfə hərəkət edən işıq şüalarından, həmçinin havadan və rəqs edən toz zərrəciklərindən hörülərək üçüncü kölgə -kədərli və qəmgin baxışlı naməlum qadın peyda oldu.
Aşağıda ,qonaq otağında gözlənilməz qonaqları atası qarşıladı.
Bəs anası? Həmin vaxt anası İfritə Aşpazla bir arada mətbəxdə evdarlıq edirdi.İfritə pilətənin üzərindəki isti havada yellənə-yellənə,aşpazlıq kitabını vərəqləyərək ədviyyatların üzərinə nə isə oxuyub onları yeməyə əlavə edirdi.Sən ancaq əlinlə toxunaraq hiss edə bilərdin ki,bunlardan hansı həqiqidir.Sənin barmaqların qoca, kök İfritənin bir tərəfini dəlib,o biri tərəfinə keçə bilərdi.Barmaqların ancaq Ev Sahibəsinin yay kimi isti bədəninə toxunduqda dayanardı.
- Əladır! - Timati qışqırdı.
- Onun ətrafında dövrə vurmaq olar! - Ralf səsləndi.
Doğru idi.
Uşaqlar xüsusi olaraq onlar üçün gözəgörünməz şüalar vasitəsilə otaqlarına gətirilmiş öz xəyalətlərinin-elektron divlərin ətrafında çoxlu dövrə vurmağa başladılar.
- Onlar həqiqidirlər!
- Tamamilə demək olmaz...
- Hər şeyi yenidən təkrar edin-Elis parlaq şüalar saçan havaya dedi.
- Hə-oğlanlar xahiş etdilər -yenidən danışın!
Timatinin otağına gələn Marlinin xəyaləti üstündən asılan zəncirləri və qıfılları silkələməyə başladı və rəngi ağarmış istridyəyə oxşayan gözlərini öğlana zilləyərək ölmüş ürəyinə görə ah-vay etdi:
- Ay başıma gələn müsibət! Həyatda özüm-özümə bağladığım zənciri indi daşımağa məcburam!Mənə dinclik yoxdur,rahatlıq yoxdur.Bu sənə dərs olsun Ebinizer Skruc!
Bu arada Ralfın yatağında kor Pyunun xəyaləti mürəkkəblə çəkilmiş dairələr olan kiçik kağız parçasını əlində büzüşdürərək qışqırdı:
- Qara işarət!Mən məhkum edilmişəm!
Otağın qaranlıq küncündən hansısa uzaq dənizin sahili boyunca uzanan yol ilə qaranlıqda addımlayan təkayaqlı adamın addım səsləri—top-tump,top-tump eşidiləndə o az qala özündən getdi.
Elis mat-məəttəl qalmışdı.
Onun xəyaləti--küləkdə dalğalanan saçları olan cavan qadın, qarla örtülmüş pəncərəni döyərək qarşısıalınmaz,son dərəcə güclü insanın adını çəkərək qışqırdı:
- Xitklif!
Qış gecəsində otağın ortasında havadan asılmış qapı taybatay açıldı.Çağırışa cavab verərək oradan bir adam qaçdı və döşəmə üzərinə düşəndə heç bir iz qoymadan əriyən qar fırtınasında itərək, İldırımlı Aşırımda yox oldu.
- Qoloqramlar-Timati pıçıldadı-telekörpü.Lazer şüaları və uydurma maşınlar.
- Sus!- kiçik olsa da yaşına görə çox ağıllı olan Ralf onun sözünü kəsdi.-Bunu bilmək istəmirəm.Mən ancaq baxmaq istəyirəm!Dünyada xəyalətlərdən yaxşı heç nə yoxdur. Kor Pyudan qabaq mənim qonaqlarım firon Tutanxamon və Rikşanın xəyalətləri olmuşdular.Lənət şeytana! Bəlkə elə indi...
O düyməyə basdı.Lazer işığı yenidən öz xalçasını toxumağa başladı.Uzaqdakı yol ilə addımlayan taxta ayaqların taqqıltısı ilə bərabər kor Pyu da yoxa çıxdı.Bataqlıqlar üzərindəki dumanlıqlardan,narın yağış altındakı ildırım işığında gözləri parıldayan bir it peyda oldu və hürməyə başladı.
- Sevimli it,-Ralf dedi-sevimli Baskervillər!
Qonaq otağında Hamletin atasının ruhu dərd çəkirdi.:-Ah,dinlə,dinlə,dinlə!Əgər sən nə vaxtsa atanı sevsən...
- Bir fincan şerri (şerri-şirin ispan arağı), - bu və ya digər yeməyi necə yaxşı bişirmək lazım olduğunu həmişə məsləhət görən , kompyuterin yaddaşındakı qadın- Mətbəx Himayəçisi xatırlatdı.-İki...
- Təşəkkür edirəm,- ev sahibəsi onun sözünü kəsdi və düyməni basdı.
Cərəyanın gücünə tabe olaraq Mətbəx Xəyaləti yoxa çıxdı.
-Nahar hazırdı!-anası dəhlizə boylanaraq qışqırdı.
- Siz,- gah Timati,gah da Skruc deyirdi - heç də siz deyilsiniz, xardal damcısısınız,qızardılmamış kartofsunuz...
Bunu eşidəndən sonra qoca Marlinin bütün sümükləri ümidsiz qışqırıqla qırılıb töküldülər və yox oldular.
-Yenə də saat səkkizdə gəl!- Ralf dedi.
İt işıqdan toxunmuş xalçanın dərinliyinə getdi.
- Heyf!-Xitklif və onun sevgilisi otağın divarının bu üzündən o biri üzünə keçib gedəndə Elis ağladı.
Qonaq otağı... Elsinorda artıq səhər açılmışdır...Hamletin atası getmişdir.Bu evin atası isə yatağından durub və gerçək analarının çağırışına qaçan gerçək uşaqları kimi və gerçək yemək kimi, çox həqiqi və realcasına nahar etməyə getdi.
Xəyalətlərin vaxtı qurtarmışdır. Lazer görüşmələrinin alaqaranlığı yoxa çıxmışdır.
Ancaq hələ qarşıda axşam var idi.Dərslərini qurtardıqda isə onları yeni-yeni xəyalətlər gözləyirdilər.Divarlarda keçmişin,bu günün və gələcəyin müqəddəs ruhları gizlənirdilər.Yolgöstərən Xəyalət pilləkənin yuxarı pilləsində dayanıb özünün xəyalət fənərini yandırıb-söndürərək işarə verdi. Onların evi indi əsl "Qarabasmalar Evi” oldu.
- Mən Platon və Aristoteli nahara dəvət etməyə cəsarət etdim-atası dedi.
- Onlar həddən çox danışırlar-Ralf donquldandı.
Ancaq bu iki qoca qəfildən səssizcə onların yanında peyda oldular.
- "Dövlət”də işlər necədir? - Timati soruşdu.
- İşlər necədir?..
Platon ona hər şeyi tez,yaxşı və doğru-düzgün şəkildə danışdı.
Heyrətlənmiş Ralf stulda qamətini dikəldərək bir neçə dəfə gözlərini qırpdı və dedi:
- Əgər belədirsə,yox olma,yenidən danış.
Platon da hər şeyi yenidən danışdı.
Kor Pyu qədər və bataqlıqlar arasındakı Baskervil itlərinin ulaşması qədər bu da çox gözəl və maraqlı idi.
Tərcümə: Aygün Süleymanqızı
Kult.Az