Xan Abdulla - Mədəniyyət və hürriyət
Poeziya
- 18.03.2015
- 0 Şərh
- 1116 Baxış
Qara-qara elektrik tellərində,
sıra-sıra düzülərək,
yorğun-yorğun qarğis tökən
dərdsiz, qayğısız qarğalar
qəfəsdən necə uzaqdır?
Böyük quldur gəmisindən
ayağına daş bağlanıb
dənizə atılmış yazıq,
əlləriylə saman gəzən
nəfəsdən necə uzaqdır?
Sözlərini əlləriylə yazan-düzən
yalan söyləyə bilməyən
ən xırdaca bir acı söz,
söyüş, təhqir eşitməyən
xoşbəxt və bakirə lal-kar
o səsdən necə uzaqdir?
Afrika ormanlarında
ov ovlayıb quş quşlayan
qanlı əti çiy-çiy yeyən
elə hey özündən deyən
lüt-üryan, qapqara zənci
kitabdan necə uzaqdır?
Ərəbistan çöllərində
"Su... Su..." -deyə inləyərək
zülüm çəkib həlak olan
mənim Həsən və Hüseynim
Gör, abdan necə uzaqdır?
Gecə-gündüz bazlıq edən
Vicdanını satıb gedən
Tiryək atıb, şərab içən,
Qüsulsuz, sünnətsiz kafir
İmandan necə uzaqdır?
Gecə-gündüz namaz qılan
halal alıb, halal satan,
oruc tutub zəkat verən,
ayda bir yol Həccə gedən
şeytandan necə uzaqdır?
Acı toxa möhtac qoyan
şah damardan yaxın olan
bizə baxıb ləzzət alan
insanı unudan tanrı
insandan necə uzaqdır?
BAX ELƏCƏ UZAQDASIZ MƏMLƏKƏTDƏN !
Xan Abdulla
Xan Abdulla
