Onun şeirləri tez-tez qadının daxili dünyası, sevgi, bədən, analıq və ölüm mövzularını özündə əks etdirir. Sadə, lakin emosional yüklü dilə malik olan bu şeirlər həm də gündəlik həyatın kiçik detallarında poetik məna axtarır.

Vera Pavlovanın əsərləri dünyanın bir çox dillərinə tərcümə olunub; xüsusilə ingilis, fransız və italyan dillərində geniş oxucu kütləsinə çatıb. O, həm də müasir dövrün feminist poetikası ilə səsləşən nadir rus şairələrdəndir. ABŞ və Rusiyada yaşamış, müxtəlif beynəlxalq festivallarda çıxış etmişdir.

Veranın şeirləri bir neçə dəfə Azərbaycan dilinə də tərcümə olunaraq, jurnal və qəzetlərdə dərc olunub.

1

mən öz gözəlliklərim barədə rəy kitabıyam

mən ərə getmək təklifləri kitabıyam

mən kişilər və iqlim barədə şikayətlər kitabıyam

mən səhvlərlə dolu talelər kitabıyam

2

Cavanlıq necə də bacarıqlıdır —

hər şeyi qocaldır:

bir gündə ayaqqabını köhnəldir,

çorabı cırır geymədən,

əl yazısına qəhvə tökür,

anaya zəng etmir,

sevgilisinə ərə gedir.

3

nə vaxt iş(l)əmək istəmirsənsə-

dənizə getmək, 

boş kinoteatrda

biletə uyğun yerə oturmaq,

bazar gecəsi

trolleybusda gediş haqqı ödəmək,

sevgiliyə ərə getmək —

sənət sənət üçün.

 

4

Səmavi lakrofag*lar üçün

bayram ziyafəti:

üç arvad

sənin ölümünə ağlayacaq.

Ölümə ərə getmişəm — üçüncü dəfə.

Bilirəm: ölüm boşanmanı tanımır.

Mişa öldü. Mişa öldü. Mişa

öldü. Zərif danışan, quş ovçusu,

mən sənin keçmiş

arvadlarından biri idim.

Amma heç vaxt keçmiş dul olmur.

5

Mən? Heç nə, primusu təmir edirəm.

Ona görə də, Ey Vaiz, daş atma artıq.

Əgər biri əlli yaşında diş düzəltdirirsə,

altmış səkkizində ərə gedir,

yetmiş doqquzunda parkda

dovşanlara şirniyyat yedirir.

Köhnə, uşaq vaxtı öyrənilən dərs:

ən dadlını sona saxla —

qocalığı uşaqlığa bənzətmək üçün.

 

6

Söhbət dodaq boyasından və

bər-bəzəkdən getmir.

Qadın — elə bir insandır ki,

hər zaman ərə getmək istəyir,

sanki fırtınalarda sakitlik var.

Və bundan qaçmaq mümkün deyil.

Hətta səninlə evlənsəm də,

yenə sənə ərə getmək istəyəcəm.

7

Mən gəlinlik paltarında 

doğulmuşam—

məhz o paltarda

ərə getmişdim

dördüncü dəfə

8

Kitab dizaynı, son iki vərəq,

başqa işlər — mənlik deyil.

Kitab çıxır — elə bil qız ərə gedir

axmağın birinə

9

Məni sevənlər

ikiqat çox idi

sevgililərdən,

onlar isə ikiqat çox idi

ərə getməyi təklif edənlərdən,

onlar isə ikiqat çox idi

ər olanlardan,

onlar isə ikiqat çox idi

uşaqlarlardan.

Uşaqlarsa — cəmi ikidir.

Daha olmayacaq.

Artıq gerçəyə çevrilməyəcək

sənə oğul doğmaq arzusu,

ey yeganə sevgilim.

10

Çıxdı üzüm axtarmağa 

üzük aldı amma 

xəyali Terentyev Kolka-

kədərdən xali cəngavər.

Ərə getmək? Olsun. 

Amma axmaqlar, şorgözlər, 

yalançılar və talançılar krallığında 

qızlarımıza 

hardan tapaq ağıllı oğlan?

Onların arzusudursa yalnız

ağatlı oğlan?

11

gündə bir dəfə

sevişmək,

həftədə bir dəfə

orkideyə su vermək,

ayda bir dəfə

kirayə ödəmək,

ildə bir dəfə

qəbir ziyarət etmək,

hər dəfə bir dəfə

ərə getmək,

ömürlük bir dəfə

dost olmaq,

həyatda bir dəfə

ölüb dirilmək —

və heç nədən

heç vaxt

peşman olmamaq.

12

Sol əl — zərif,

sağ əl — zəhmətkeş.

Sağda — bez və qələm,

bıçaq və bayraq dirəyi.

Ərə? Ancaq Ştoltsa!**

Xoşbəxtlik sağ əllə yaranır, yaşayır.

Sol əl isə barmağında üzük

və biləyində qırmızı lent daşıyır.

 

13

Toy süfrəsinin cah-calalı.

Acı mı? Acı. Şirin mi? Şirin.

Qızını ərə verdi —

tam, son damlasına qədər.

Pıçıltı ilə dedi: "Axır ki!”

Paltarının qırışlarını düzəltdi.

Qaçdı nikaha —

dönüb baxmadan, dönüb baxmadan...

*Lakrofag - başqalarının acısından bəslənən varlıq

**Andrey Ştolts İvan Qonçarovun "Oblomov" adlı məşhur romanının qəhrəmanıdır. O, fəal, məqsədli, çalışqan, rasional və qərb tipli mütərəqqi fikirlərə malik insandır. Müəllif onu "tənbəl, passiv, həyat eşqi sönmüş" Oblomovla ziddiyyət təşkil edən ideal kişi modeli kimi təqdim edir. Ştolts həmçinin İlyanın (Oblomovun) yaxın dostudur və roman boyu onu ayıltmağa, həyata qaytarmağa çalışır.