- Ey, Mışin, dur!

Mışin dedi:

- Durmayacağam.

Və döşəmədə uzanmağa davam etdi.

Belə olanda Kaluqin Mışinə yaxınlaşıb dedi:

- Əgər sən, Mışin, ayağa durmasan, onda mən səni durmağa məcbur edəcəyəm.

- Yox, - döşəmədə uzanmağa davam edən Mışin dedi.

Bu dəfə də Selizneva Mışinin yanına gəldi:

- Siz, Mışin, həmişə koridorda uzanırsınız, əl-ayağa dolaşırsınız, bizə mane olursunuz.

- Mane olmuşam və yenə olacağam, - Mışin dedi.

- Bilirsiniz… - Korşunov sözə başladı, amma Kaluqin onun sözünü kəsdi:

- Nə üçün uzadırıq? Milisə zəng eləyək.

Zəng edib milis çağırdılar.

Yarım saat sonra milis dalandarla içəri girdi.

- Nə olub? – milis soruşdu.

- Özünüz baxın, - Korşunov dedi, amma Kaluqin onun sözünü kəsdi:

- Baxın. Bu vətəndaş bütün günü koridorda uzanır, bizim gediş-gəlişimizə mane olur. Nə qədər deyirik, kar görmür…

Selizneva Kaluqinin sözünü kəsdi:

- Ona deyirik ayağa dursun, amma o durmur.

- Elədir, - Korşunov dedi.

Milis Mışinə yaxınlaşdı.

- Vətəndaş, nə üçün yerdə uzanmısınız?

- Dincəlirəm, - Mışin dedi.

- Burda, vətəndaş, dincəlmək yeri deyil, - milis dedi. – Siz harda yaşayırsınız?

- Burda, - Mışin dedi.

- Sizin otağınız hansıdır? – milis soruşdu.

- O bizim mənzildə qeydiyyatdadır, amma otağı yoxdur, - Kaluqin dedi.

- Siz mane olmayın, vətəndaş, - milis dedi. – Özüm indi onunla danışacağam. Vətəndaş, siz harda yatırsınız?

- Burda, - Mışin dedi.

- İcazə  verin… - Korşunov sözə başladı, amma Kaluqin onun sözünü kəsdi.

- Onun heç çarpayısı da yoxdu, quru döşəmədə uzanır.

- Sakinlər çoxdandır ondan şikatəy edir, - dalandar dedi.

- Koridordan keçmək mümkün deyil, - Seliznova sözə başladı. – Mən həmişə kişinin üstündən atlana bilmərəm. O isə ayaqlarını uzadır, əllərini uzadır, özü də kürəyi üstdə uzanıb baxır. Mən işdən yorğun gəlirəm, dincəlmək istəyirəm.

- Qatılıram, - deyə Korşunov dedi, amma Kaluqin onun sözünü kəsdi:

- O gecələr də burda uzanır. Qaranlıqda hamımız ona toxunuruq.

Selizneva dedi:

- Həmişə də cibindən mıx tökülür. Koridorda ayaqyalın gəzmək mümkün deyil, diqqətli olmasan mıx ayağına batır.

- Bu yaxınlarda onu kerosinlə yandırmaq istədilər, - dalandar dedi.

- Biz kerosini onun üstünə tökdük, - Korşunov dedi, amma Kaluqin onun sözünü kəsdi:

- Biz onu qorxutmaq istəyirdik, yandırmaq istəmirdik.

- Mən heç icazə verməzdim ki, yanımda diri adamı  yandırsınlar, - Selizneva dedi.

- Bəs nə üçün bu vətəndaş koridorda uzanır? – milis qəfildən soruşdu.

- Salam-məlekim! – Korşunov dedi, amma Kaluqin onun sözünü kəsdi:

- Çünki onun başqa yaşayış yeri yoxdu. Baxın, bu otaq mənimkidir, bu biri o otaqda qalır, o biri də o biri otaqda. Mışin isə burda, koridorda yaşayır.

- Belə olmaz, - milis dedi. – Hamı öz yaşayış yerində uzanmalıdı.

- Axı onun koridordan başqa yaşayış yeri yoxdu, - Kaluqin dedi.

- Elədir, - Korşunov dedi.

- Buna görə də həmişə koridorda uzanır, - Selizneva dedi.

- Belə olmaz, - milis bunu deyib dalandarla bir yerdə getdi.

Korşunov Mışinin yanına gəldi.

- Nə baxırsan? Xoşuna gəldi?

- Gözləyin, - Kaluqin dedi və Mışinə yaxınlaşdı. – Milisin nə dediyini eşitdin? Tez ol, dur ayağa!

- Durmayacağam! – Mışin uzanmağa davam etdi.

- O bundan sonra bilə-bilə burda uzanmağa davam edəcək, - Selizneva dedi.

- Məlum məsələdir, - Kaluqin hirslə əlavə etdi.

Korşunov dedi:

- Buna şübhə etmirəm. Parfaitement!

8 noyabr 1940