Seymur Su - Şəhər
- 17.03.2015
- 0 Şərh
- 1143 Baxış
xoşbəxt anlarımtək qısa ipləri
tez-tez açılan,
diplomumla yaşıd dabanları deşilən,
kölgəmi tapdalamaqdan
yorulan ayaqqabıların izidir -
ömür yollarımın cızıldığı şəhər..
kar insanlara dönə-dönə danışmaqdan,
dərin quyulara dərdini qışqırmaqdan
boğazı tutulan insanların
son ümid mənzilidir -
susqun şerlərin yazıldığı şəhər..
burda insanlar dözümsüzdü.
çətirin altında gizlənir özlərindən.
qaçaqaça düşən yağış nöqtələrindən
evinə çəkilənlər belə bilmir ki:
bura - küçə itlərinin qısıldığı şəhər..
haram, halal bilmədən
"ötürən",
körpə heysiyyatları amansızca öldürən
yekəqarın "kişilər"in addımlarını
möhkəmdən basdığı yerdi -
incə qadınların sarsıldığı şəhər..
bura - sovet binasının mənzərəsindən
şam işıqlarının sızıldığı şəhər..
arada şerləri belə bezdirir
gənc Nəsimilərin asıldığı şəhər..
sevgi ərizəsini zibilqablarında
gəzdirir
nifrət damğasının basıldığı şəhər..
Seymur Su