AzTV-də yeni layihələr başlayır

AzTV-də yeni layihələr başlayır

Yeni mövsümdə Azərbaycan Televiziyasında yeni layihələrə start verilir.

Müxtəlif məzmunlu 7 layihə sentyabrın ortalarından efirdə olacaq. "Çöl adamı ilə səyahət”, "Əsrlər, nəsillər”, "Molla Nəsrəddin”, "Əslində biz”, "Peşəkarlar”, "Yüksələn Bakı” və "Orada bir kənd var” layihələrinin tanıtım videoçarxları artıq TV-də və sosial şəbəkələrdə yayımlanır.

Yeni verilişlər tanınmış simalar - Kamal Dəniz, Fuad Axundov, Dilarə Səlim, Günel Habilqızı və digərlərinin təqdimatı ilə efirə çıxacaq. Layihələrlə bağlı ətraflı məlumat veriləcək.

Bundan başqa, Azərbaycan Televiziyası yeni mövsümdə tamaşaçılara müxtəlif sənədli filmlər də təqdim edəcək. Onlardan bir neçəsinin çəkiliş prosesi artıq yekunlaşıb. Bəzilərinin isə çəkilişləri davam edir.

Qeyd edək ki, ölkənin əsas kanalı ötən mövsümdən efirə verilən verilişlərin də yeni videoçarxlarını yayımlayıb. Belə ki, verilişlərin studiyaları yenilənib. Bundan başqa hər biri tamaşaçı qarşısına yeniliklərlə çıxacaqlar.

Diqqət çəkən yeniliklərdən biri "Xəbərlər” informasiya proqramında olacaq. Belə ki, "Xəbərlər” tam yeni studiyada yeni simalarla təqdim ediləcək.