Diasporla İş üzrə Dövlət Komitəsindən bildirilib ki, mərasimdə Fransada "Yamaha” musiqi məktəbinin direktoru Jan Mişel Duran, Kolmar şəhərinin Ticarət və Sənaye Palatasının prezidenti Kristyan Ros və digər şəxslər iştirak ediblər. Qonaqlar musiqi məktəbinin fəaliyyətə başlaması münasibətilə azərbaycanlı musiqiçini təbrik edib və xoş arzularını çatdırıblar.

Qeyd edək ki, məktəbdə piano və vokal musiqi dərsləri, xarici və yerli bəstəkarların əsərləri tədris olunacaq.

Xatırladaq ki, Bakıda anadan olan İlahə Ahui burada fortepiano sinfində təhsil alıb və kiçik yaşlarından xor solisti olub. O, on iki yaşında Bakı haqqında ilk mahnısını bəstələyib. Qərb Universitetinin Menecment fakültəsindən məzun olan İlahə Ahui 1999-cu ildə Fransanın Strasburq şəhərinə, bir il sonra isə Strasburqdan Kolmar şəhərinə köçüb və 23 ildir orada yaşayır. O, 2012-ci ildə Kolmar şəhər Milli Konservatoriyasının (Conservatoire National de Colmar) dirijorluq və vokal sinfinə daxil olub. Hazırda həmin konservatoriyanın müəllimi olan İlahə Ahui Fransada Azərbaycan mədəniyyətini təbliğ edir.

İlahə Ahui yerli xor qruplarına dirijorluq etməklə yanaşı, həmçinin Kolmardakı "Yamaha” musiqi məktəbində müəllimlik fəaliyyəti ilə məşğul olub. Uzun və zəngin musiqi karyerasına malik olan azərbaycanlı musiqiçi özünün məktəbini təsis etmək qərarına gəlib.

İlahə Ahui Fransadakı Azərbaycan icmasının fəal üzvlərindəndir.