Uzanıb bütün gecəni

Fikirləşəndə

Necə tapa bilərəm ruhuma

Suyun susamadığı

Çörəyin daşa dönmədiyi bir evi

Nəhayət, yanlış olmadığını düşündüyüm 

Bir qənaətə gəldim ki,

Heç kəs

Amma, heç kəs

Bu dünyada tək başına bacara bilməz.

Tənha, tək-tənha

Heç kəs, amma, heç kəs

Tək-tənha bacara bilməz.

Bəzi milyonerlər var

Xərcləyə bilmədikləri pullarıyla

Arvadları ortalıqda kabus kimi gəzir,

Blüz mahnıları oxuyur uşaqları.

Bahalı həkimləri var

Daşdan ürəklərini sağaltmaq üçün.

Amma, heç kəs

Yox, heç kəs

Burada təkbaşına bacara bilməz.

Tənha, tək-tənha,

Heç kəs, amma, heç kəs

Tək-tənha bacara bilməz.

İndi diqqətlə dinləsən məni

Danışaram sənə bildiklərimi.

Toplanır  fırtına buludları,

Əsməyə başlayır küləklər,

Əzab çəkir insanlıq

Və eşidirəm iniltiləri.

Çünki heç kəs,

Və heç kəs

Burada tək başına bacara bilməz.

Tənha, tək-tənha

Heç kəs, amma heç kəs,

Tək- tənha bacara bilməz.

Orijinal mətn https://poets.org/poem/alone

Gözəl qadınlar bilmək istərlər nədədir sirrim

Sevimli deyiləm, doğulmamışam model ölçüsündə

Amma danışmağa başlayanda,

Yalan dediyimi düşünürlər.

Deyirəm ki,

Qollarımın arasındadır.

Ombalarımın genişliyində,

Atdığım addımlarda,

Qıvrılan dodaqlarımdadır.

Qadınam mən,

Görülməmiş,

Qeyri-adi qadın.

Otağa daxil olaram,

İstədiyiniz kimi soyuqqanlı bir şəkildə.

Bir kişiyə yaxınlaşaram

Ayağa qalxar bütün kişilər

Ya da qabağımda diz çökərlər.

Sonra arı sürüsü kimi 

Ətrafımda dolaşarlar.

Deyirəm ki,

Gözlərmin atəşində,

Dişlərmin parıltısında,

Yırğalanan belimdə

Ayaqlarımın coşqusundadır.

Qadınam mən ,

Görülməmiş,

Qeyri-adi qadın.

Kişilər də bilmək istərlər,

Mənim sirrimi.

Çox çalışarlar,

Amma toxuna bilməzlər

Daxilimdəki müəmmaya.

Göstərməyə çalışanda isə

Görə bilmədiklərini deyərlər.

Deyirəm ki,

Kürəyimin əyriliyində

Gülüşümün günəşində

Titrəyən sinəmdə

Qamətimin incəliyindədir.

Qadınam mən 

Görülməmiş 

Qeyri-adi qadın.

İndi anlayırsan,

Niyə əyilmir başım.

Qışqırmaram, atılıb düşmərəm,

Ucadan, yüksək səslə danışmaram.

Yanından keçdiyimi görmək

Qürurunu oxşamalıdır.

Deyirəm ki,

Dabanımın taqqıltısında

Saçımın buruğunda,

Əllərimin içindədir.

Çünki, mən qadınam

Görülməmiş,

Qeyri-adi qadın.

Orijinal mətn: https://www.poetryfoundation.org/poems/48985/phenomenal-woman

 

Cəsarətin nə olduğunu bilməyən,

Xoşbəxtlikdən didərgin düşən bizlər,

Yaşayırdıq sarılıb tənhalıq topunun mərmisinə.

Lakin sevgi öz müqəddəs məbədini tərk etdi,

Yanımıza gəldi,

Bizi xilas edib həyata qaytardı.

Sevgi gəldiyi qatarla 

Bizə itirdiyimiz xoşbəxtliyi,

Köhnə xatirələrin şirinliyini,

Hətta ötən günlərin ağrı-acısını da gətirdi. 

Əgər güclü olsaq,

Qəlbimizi zəncirləyən qorxulardan da 

Azad edər bizi sevgi.

Tərk edib qorxularımızı 

Cəsarəti tapdıq 

Sevgi işığının hərarətində.

Və qəflətən anladıq

Sevgi bütün bunlara dəyərmiş.

Çünki bizə azadlıq verən 

Təkcə odur. 

Orijinal mətn: https://www.poemhunter.com/poem/touched-by-an-angel/

QEYD: 

Vəliyeva Sonası 1997-ci il 22 iyun tarıxində Bakı şəhərində doğulub. 2014-2018-ci illərdə Azərbaycan Dillər Universitinin Filologiya (ingili dili və ədəbiyyatı) ixtisası üzrə təhsil alıb. Hal-hazırda təhsilini magistr dərəcəsi üzrə Xəzər universitetində linqvistika bölməsində (ingilis dili üzrə) davam etdirir.