Salman Rüşdiyə hücum edən şəxs təqsirli bilindi - 32 il cəza verilə bilər
- 26.02.2025
- 0 Şərh
- 20 Baxış
2022-ci ilin avqustunda yazıçı Salman Rüşdi Nyu-Yorkun Şatoqua şəhərində keçirilən tədbirdə səhnədə hücuma məruz qalmışdı. O, sürgündə olan yazıçılar üçün təhlükəsiz sığınacaq kimi ABŞ-ın yeri barədə mühazirə oxumağa hazırlaşırdı. Yarpaq.Az-ın verdiyi xəbərə görə, hücum zamanı Rüşdi üzündən və qarın nahiyəsindən on bıçaq zərbəsi alaraq ağır xəsarət aldı və nəticədə sağ gözünün görmə qabiliyyətini itirdi. Hüquq-mühafizə orqanları hücumçunun Nyu-Cersinin Ferveyu şəhərindən olan 24 yaşlı Hadi Matar olduğunu müəyyən edərək onu saxladılar. Salman Rüşdi uzun illərdir ölüm təhdidləri ilə üzləşir, xüsusilə də İran hökuməti ona qarşı fətva verərək açıq şəkildə qətlini tələb edib. Lakin İran hökuməti hücumla əlaqəsi olduğunu inkar edib.
Hücumdan sonra Rüşdiyə geniş ictimai dəstək ifadə olundu. O, başına gələn hadisə haqqında "Bıçaq: qəsdən adam öldürməyə cəhd barədə düşüncələr" adlı bestseller kitab yazıb.
2024-cü ilin iyulunda Matar ittiham tərəfinin təklif etdiyi anlaşma müqaviləsindən imtina etdi. Məhkəmənin 2024-cü ilin yanvarında başlaması planlaşdırılsa da, müdafiə tərəfinin Rüşdinin xatirə kitabının qaralama versiyalarını məhkəməyə çıxarmaq üçün vaxt tələb etməsi səbəbindən proses təxirə salındı.
Məhkəmə nəhayət bu ilin fevralın 10-da Nyu-Yorkun Meyvill şəhərindəki Şatoqua dairə məhkəməsində başlayıb.
Məhkəmə prosesində ifadə verən Salman Rüşdi dedi: "Mən öləcəyimi düşündüm. Həmin an əsas düşüncəm bu idi. Onun gözləri məni çox təsirləndirdi – qaranlıq və çox qəzəbli görünürdü.”
Matar məhkəmədə ifadə verməyib və müdafiə komandası heç bir şahid təqdim etməyib.
Şatoqua məhkəmə heyəti Matarı qəsdən adam öldürməyə cəhddə təqsirli bilib. O, eyni zamanda tədbirin moderatoru Ralf Henri Risə xəsarət yetirdiyinə görə təqsirkar hesab edilib. Matar 32 ilədək həbs cəzası ala bilər. Hökm 23 aprel tarixində elan olunacaq.
