İlkin Tomar – Ölüm sayan (hekayə)
- 29.05.2015
- 0 Şərh
- 2417 Baxış
Əsgər Şirinovun əziz xatirəsinə...
İstər soyuq və qaranlıq zindanlarda, istərsə də günəşli və qızılla tikilmiş saraylarda sayılan hər gün ömürdən gedən gündür!
28 sentyabr 2008 Ağ Cəhənnəm
Artıq doqquz ay idi ki, evdən uzaqda
idim. Gün saymaqla aram yox idi, amma demək olar ki yarılamışdım icbari hərbi
xidmətimin müddətini. Xidmət etmiyimiz yerdə iki rəng var idi. Ağ Cəhənnəm və
boz səma. Avqustun sonlarında yağan qar deyilənə görə iyun-iyul aylarında ancaq
əriyib yerini sarımtıl-boz torpağa verir. Hələ yaya çox var idi. Bu günlərdə
bir qrup əsgər öz xidmətlərini başa vurub evlərinə dönəcəkdilər. Onların
ev-eşiklərinə dönmələrini həzm edə bilməsək də, bir yandan da buna sevinirdik.
Bu sevinc hissi onların doğmalarının yanına dönmələri ilə əlaqədar deyildi. Sadəcə
səndən qabaqkılar gedirsə deməli sənin də getməyinə az qalır, demək idi.
Hərbidə yazılmayan qanunlardan biri də bu idi
ki, köhnə əsgərlər gənc əsgərlərdən hər zaman üstün olmalı, onlardan daha çox
istirahət etməli, daha az işləməli idilər. Bu yazılmayan qanun heç də gizlicə
icra olunmurdu. Bütün zabit-gizir heyətinin bundan xəbəri var idi. Hələ desəm
ki, buna özləri də şərait yaradırdılar heç yanılmaram. Buna görə də gənc əsgərlərlə
qoca əsgərlər arasında hər zaman pərdə olurdu. Gənclərə görə qocalar vicdansız,
kobud, mənəviyyatsız və hətta düşmənlə bərabər tutulan adamlar idilər. Bəli
adamlar. Çünki hərbidə insanlıq deyə bir nüansa çox nadir hallarda rast gəlmək
olar. Xüsusilə də döyüş bölgələrində bu çox müşkül məsələdir. Lakin məsələ
ondadır ki bu günün gənc əsgəri sabah qoca əsgər olanda öz "babalarından” geri
qalmırdılar.
Amma aralarında Şirinov kimi təmizürəkli,
xoşxasiyyətli və dürüst birilərinə də rast gəlmək olardı. Şirinov nadir əsgərlərdən
idi ki, ona adam kimi yox insan kimi baxırdıq.
Şirinovun boyu 165-170 sm olardı.
Qarabuğdayı üzünün sol yanağında çapıq var idi. Qabaq dişlərindən biri yodsuz
qar suyu içməkdən minası zədələnmiş və qırılmışdı. Su qıtlığı olduğundan içməli
su ehtiyacımızı qar əridərək ödəyirdik. Hərbi xidməti bitirənlərin çoxlarının sədası
xəstəxanalardan gəlirdi. Ən çox da mədə-bağırsaq, böyrək, təzyiq və diş müalicəsinə
görə müraciət edirdilər vətənə borclarını verənlər. Və təbii ki bütün müalicə xərcləri
öz hesablarına olurdu.
Şirinov digərləri kimi hər ötən günü sayıb evə
qovuşacağını gözləyirdi. Gün saymaq üçün adətən cib darağının dişlərini
qırmaqdan, botinkanın ip deşiklərindəki dairəvi dəmirləri çıxarmaqdan, kəmərin
iç tərəfinə xətlər qoymaqdan və başqa üsullardan istifadə edilirdi. Şirinovunsa
cib darağında iki diş qalmışdı. Çox həyəcanlı görünürdü.
29 Sentyabr 2008 Ağ Cəhənnəm
Axşamdan yağan qar kazarmalar,
yeməkxana, hamam-ayaqyolu və anbarlar arasından olan iki nəfərlik açdığımız
cığırları örtmüşdü. Səhər yeməyindən sonra növbə ilə gediş-gəliş üçün nəzərdə
tutulan örtülmüş cığırları təmizləməyə başladıq. Qar təmizlənməsində adətən gənc
əsgərlər iştirak edirdilər, qocalarsa kazarmada isti kömür sobasının ətrafına
yığışıb ya söhbət edər, ya da gənclərdən
birini qapının ağzına kəşfiyyatçı kimi qoyub siqaretdən qumar oynayardılar. Qar
atdığımız zaman Şirinov yanımıza gəldi. Qapının ağzında cibindən çıxardığı
qutusu iyirmi qəpik olan siqaretinin birini damağına qoydu. Əlləri ilə ciblərini
yoxladı. Alışqanı yox idi. Qapının ağzında dayanıb qar atmaq üçün öz növbələrini
gözləyən əsgərlərdən kibritlərinin olub-olmamasını soruşdu. Hərbidə bir də belə
yazılmayan qanun vardı. Qocalardan kimsə gənclərdən nəsə istəsələr və bu istədikləri
şey onların xoşuna gəlsəydi bu artıq qocanın olmalı idi. Buna görə də kimdəsə
kibrit və ya alışqan vardısa da heç kim səsini çıxarmadı. Mən cibimdəki içində
4-5 ədəd kibrit qalan qutunu Şirinova uzatdım. Şirinov kibriti alıb siqaretini
alışdırdı. Kibriti qaytaranda bir siqaret də mənə verdi. Sonra sözə başladı:
- Bilirsən, Abdullayev, sabah bu lənətə
gəlmiş xarabadan gedəcəm. Amma hələ də inana bilmirəm ki, bir günüm qalıb. Bu
on səkkiz ay ərzində nə məzuniyyətə getdim, nə də bir mülki geyimli adam
gördüm.
- Gedən kimi ilk işin nə olacaq,
Şirinov?
- Gedən kimi anamın məzarını ziyarət
edəcəm ilk növbədə - Şirinovun anası
altı ay olardı ki, xərçəngdən dünyasını dəyişmişdi.
- Bəs sonra?
- Sonra.... sonrasa atam olan o əclafın
üzünə tüpürüb, bacımı da götürüb gedəcəm Bakıya işləməyə. On səkkiz aydır ki, hər
gün burada bitəcək günlərimi sayıram. Məni çox gözəl həyat gözləyir irəlidə.
Allahın köməkliyi ilə xəyalımda olan hər şeyə nail olacam.Evlənəcəm, uşaqlarım
olacaq. Bacıma da özüm baxacam. Mən
böyük adam olacam. Atam olacaq o əclafa hər şeyi, nəyə qadir olduğumu sübut edəcəm
- Sanki atasına olan hirsini siqaretdən çıxırmış kimi filteri dişləri ilə çeynəməyə
başladı - Anamın xəstələnməyinə, ölməyinə
o əclaf səbəbkar olub. Onunla bir gün belə eyni dam altında qalmaram. Amma şükür
Allaha bu Ağ cəhənnəmdən canım qurtarır - Biz Soyuq dağa Ağ Cəhənnəm deyirdik.
30 Sentyabr 2008 Ağ Cəhənnəm
Gecədən hazırlaşan qocaların gözlərinə
yuxu getməmişdi. Hamısı səbirsizliklə səhərin açılmağını gözləyirdilər. Kimisi
gənclərə acıq verərək, qalanların hələ burada çox çürüyəcəyini deyir, kimi Ağ Cəhənnəmdə
son gecələrinin olduğunu vurğulayırdılar. Səhər saat onda qocaların hamısını
yeməkxanaya yığıb yoxladılar. Sonra iyirmi beş kilometrlik yolu piyada düşmək
üçün düzüb yanlarına da bir zabit və gizir qoşdular. Onların gözlərində sanki
günəş doğmuşdu. Havanın çovğunlu olmağına baxmayaraq heç biri bu soyuğun fərqində
deyildi. Şirinovunsa bir cüt qanadı çatmırdı sanki. Bir saat keçməmiş qocalar
ağa bürünmüş dağ yolunda gözdən itdilər.
1 Oktyabr 2008 Ağ Cəhənnəm
Dünənki çovğundan əsər-əlamət qalmamışdı. Hava çox təmiz idi. Soyuq dağ havası
ciyərlərimizi işğal edib, içimizə titrətmə salırdı. Birdə bütün taborun təcili
düzülüş meydanına yığılmağı barədə əmr gəldi. Havanın sakitliyini nəzərə alıb səngərdə
və taborun yollarında işləmək üçün düzüləcəyimiz ehtimalı yüz faiz idi.
Soldan sağa Zirab, On dördüncü bölük,
On beşinci bölük və Qərargah bölüyü postda və növbətçi olan əsgərlər xaric tam
heyətlə düzülüş meydanında idi. Beş dəqiqə
keçməmiş tabor komandiri mayor Abdullayev taborun qarşısına keçdi. Baş
leytinant Abbasov mayor Abdullayevə hərbi salam verərək taborun tam heyətlə
düzülüş meydanında olmağını məruzə etdi. Mayor Abdullayev geri dönərək daşdan
hörülmüş tribunaya çıxdı:
- Salam, əsgər!
- Salam..- hamı bir ağızdan dilləndi.
- Sizə bir üzücü xəbəri bildirməyi özümə
borc bilirəm. Dünən təxris olunmuş əsgərlərdən biri kəndlərinin girəcəyinə girmək
üçün yolu keçərkən çox bədbəxt hadisə baş vermişdir. Ani diqqətsizlik
ucbatından Kamaz markalı yük avtomobili əsgəri vurub üstündə keçmiş və əsgərin
başı təkərlərin altında qalaraq elə yerindəcə
keçinmişdir. Biz taborumuz və hərbi hissəmiz adından əsgərin ailəsinə
baş sağlığı veririk. Axır qəmləri olsun.
Mayor Abdullayev nitqini bitirdikdən
sonra öz otağına getdi. Taborasa gündəlik görüləcək işlərin bölgüləri verildi.
Hamı sarsılmışdı. Mənsə ikiqat sarsılmışdım
Sarsıntımın ikiqat olmağı isə bu əsgərin Şirinov olması idi. O sən demə
xoş anlarına, azadlığına qovuşacağını deyil, ölümünü sayırmış.