Rasət Pirisoyu. ŞEİRLƏR
Poeziya
- 13.06.2019
- 0 Şərh
- 2155 Baxış
***
Gəlirsən, gedirsən, əllər uzanır,
gəlirsən, gedirsən, illər uzanır,
gəlirsən, gedirsən yollar uzanır,
yol
yoldan ayrılır,
il ildən qopur,
heç nəyi bir yerə yığa bilmirsən,
Ay səni itirir,
gün səni tapır,
gedib o yerlərə çıxa bilmirsən...
Həsrəti araya düşür,
hey düşür,
hardansa bir nanə qoxusu gəlir,
yadına dərə,
dağ,
dəniz,
göy düşür,
yorğun gözlərinin yuxusu gəlir.
Hərdən
boğulusan durduğun yerdə,
havanda
o yerin havası çatmır,
Yolunun üstündə dumandan pərdə,
canında
bir sərçə yuvası çatmır.
Bəzən
yağışları düşür yadına,
yağan yağışları...
... qırx gün, qırx gecə...
Sığınıb bir körpə quş qanadına,
ağlından
hönkürmək keçir gizlicə...
Səni
o yerlərdən kim perik saldı? -
ya bəlkə aldatdı hərə bir cürə,
Ürəyin
yetim iək o yerdə qaldı,
özünü götürüb gəldin şəhərə...
Və indi,
min ildi,
hər gün, hər gecə,
bir yuxu,
bir yağış,
bir ev,
bir küçə,
bir ana gileyi
baş alıb gəlir,
əlinə, ovcuna daş alıb gəlir,
gözünün içinə yaş alıb gəlir,
gəlib,
görür ki,
elə saçlarına dən düşür, düşür,
ömrünün
bir qotur payı görünmür,
elə gözlərinə çən düşür, düşür,
illərin
həftəsi, ayı görünmür...
......................................
......................................
Bir durna harayı dinər uzaqda
Səsində əbədi bahar həsrəti,
O yerdə sərçələr donar soyuqda,
gönlündə, gözündə yaz səadəti.
***
Söndürür işıqları…
hey…
qaranlıq adamlar,
Bu sonuncu işıqdır bəlkə yandırıram mən,
Sevinirəm son dəfə, heç olmasa işıq var,
Bu sonuncu işığın yapışıram əlindən…
Çəkir məni ardınca, çəkir sonuncu işıq,
«Çəkir» yerinə düşümür,
bəlkə «sürüyür!» deyim.
Hardansa ömür əsir üzümə meh qarışıq,
Açır,
yaxasın açır,
əynimdəki köynəyim.
Üz tütüram bəlkə də
son dəfə
son nəfəsə,
Sonuncu qürub kimi qurtarıram, bitirəm.
Yadımda qalır ancaq
işıq, işıq…
nə isə,
Gözlərimi korlara bağışlayıb gedirəm.
***
Bu otların,
çiçəklərin qoynunda,
bircə elə, səni, səni istədim,
Meh dolaşdı boğazımda, boynumda,
əllərini, əllərini istədim.
Amma sənsə...
Heç bilmirəm nə deyim,
Gəlişini qoydun bu gün, sabaha,
Yığışmadı bu yollardan gileyim,
başım üstə
göylər batdı günaha.
Həsrətini əzizlədim, duruldum,
ürəyimə bir yad baxa, qoymadım,
Bu qızlardan,
qadınlardan yoruldum,
Səni, səni gözləməkdən doymadım.
***
Mən
hansısa dünyanın bəlkə günahkarıyam,
Bəlkə cəza çəkməyə gəlmişəm yer üzünə,
Gəlmişəm günahımı yer üzündən tanıyam,
tanıyam, cəza çəkəm…
Və qayıdam özümə…
Gəlmişəm,
amma hanı
hanı, hanı o çəza,
Ya rəbb, bəlkə çəzadı elə düşünmək özü,
Bəlkə görmək, eşitmək cəza verilib bizə,
Sən sınağa çəkirsən bəlkə sevgiylə bizi,
Bəlkə daha çox sevən
daha çox cəza çəkir,
çox istəyən
daha çox yaxın olur çarmıxa,
Ya rəbbim, içərimdə ulu göylərin çökür,
Məni bu yer üzüylə sınağa çəkmə daha…
***
Bilmirəm,
nəfəsi qalıb havada,
yoxsa canımdakı nağıl xofudu,
Elə bil nəsə var bu boz qayada,
o nəsə,
bu yeri, bu göyü tutub,
və hopub havaya
və hopub suya,
yata bilməmişəm sabaha kimi,
Gözümü yummuşam,
bu bomboz qaya,
yeriyib üstümə
əjdaha kimi...
Açılıb sabahım təlaş içində,
Deyəsən, xəfifcə əsir dizlərim...
Par-par parıldayır bədəni gündə,
Qaçmağa
bir gizlənc gəzir gözlərim
.
Baxıram
hər tərəf torpaqdı, daşdı,
Burda nəfəs alan bircə mənəm, mən...
İlahi, bu nədir?
Ağlımmı çaşdı -
Elə bil tərpəndi qaya yerindən...
Bəlkə cansız deyil,
canlı daşdı bu,
Bəlkə daş olmaqdan
bu, doyub cana?
Bütün duruşuyla bir savaşdı bu,
İçində vurnuxur o yan - bu yana...
Diridi,
dipdiri əyri pəncəsi,
Zalımlıq hayqırır bütün görkəmi,
Ancaq bağırmağa çatmır nəfəsi,
hey açır ağzını,
hey,
kaha kimi...
O boğub içində çiçəyi, otu,
Əlinə keçəndən can qamarlayıb,
Deyəsən, bu dəfə mənə üz tutub -
Məni qurban bilib, cəsəd, can sayıb.
Birdən diksinirəm,
ürpənir içim,
O, bəlkə hamıdan aldığın alıb.
Özünü,
özünü diriltmək üçün,
ala bilmədiyi bir məndə qalıb.
Axı məndə nə var?
Nə istəyə ki?
Nəfəsdir dirildən hər şeyi bəlkə?
Mənim nəfəsimi nəfəsi təki,
O məndən,
o məndən istəyir bəlkə...
Qəfildən elə bil dəyişir hər şey,
mənə əziz olur udduğum hava,
Donüb körpəm olur bu torpaq, bu göy,
on addım qıraqda qazılmış yuva.
O birdən məndə də tapsa özünü,
Canına can qatsa son nəfəsimdən...
.......................................................
.......................................................
Bəlkə mən...
bircə mən...
bu yer üzünü,
mən xilas edirəm,
bu vəhşidən,
mən...
(2018-2019)